चितवन । राप्ती नगरपालिकाले आन्तरिक स्रोतको अभाव देखाउँदै व्यापक कर्मचारी कटौती गरेको छ । नगरपालिकाले आन्तरिक स्रोतको अभाव नभई अख्तियारको चासोको कारण देखाउँदै ७२ जना दैनिक ज्यालादारीमा राखिएका कर्मचारीलाई  हटाएको छ। त्यसमा चारजना चिकित्सक, एक इन्जिनियरलगायत रहेका छन्।

नगरपालिकाका प्रमुख शम्शेर लामाले प्रमुख, उपप्रमुखका सवारी चालक, एम्बुलेन्स चालकसमेत हटाउनु परेको बताएका छन्। नगरपालिकाले सूचना जारी गर्दै सबै ज्यालादारी कर्मचारीलाई कार्यालय नआउन र कार्यालयलाई हाजिरी नगराउन निर्देशन दिएको छ। 

नगरपालिकाका पशुपन्छी विकास शाखाका प्रमुख शैलेन्द्र भण्डारीद्वारा जारी सूचनामा आन्तरिक आम्दानीको सुनिश्चितता नभएको र अख्तियार दुरुपयोग अनुसन्धान आयोगले समेत प्रश्न उठाएकाले बाध्य भएर कर्मचारी हटाउनु परेको उल्लेख छ।

ज्यालादारी कर्मचारी हटाउने निर्णय नगरपालिकाको १४औँ नगरसभाबाट गठित सहजीकरण समितिले गरेको थियो । समितिले जेठ १९ गते निर्णय गर्दै हटाउने प्रक्रिया अघि बढाएको हो। प्रमुख लामाले ज्यालादारी कर्मचारीलाई करारमा लैजान कार्यपालिकाबाट ‘ओएनएम’ गरेको भए पनि परिषद् हुन नसक्दा निर्णय गर्न नसकिएको बताएका छन् । 

गत आर्थिक वर्षदेखि अहिलेसम्म परिषद् हुन सकेको छैन। ज्यालादारी कर्मचारीहरुको चैतसम्म म्याद रहेकामा थप निर्णय गर्न नसक्दा समस्या परेका उनले बताए। नगरपालिकाको सो निर्णयसँगै नगरका स्वास्थ्य संस्था, शाखा–उपशाखा, वडा कार्यालय र कृषि तथा पशु सेवा केन्द्रको सेवा प्रभावित हुने देखिएको छ। नगरपालिकाले दैनिक मिर्गौला, मुटु र क्यान्सरका बिरामीलाई अस्पताल लैजाने गरेकामा सो कार्यसमेत प्रभावित भएको लामाले बताए ।